Kiel vi jam scias, mi tre interesiĝas pri iloj, per kiuj oni povas krei interagan fikcion kaj simplajn ludojn. Laŭ mi, ili rompas la tradiciajn barojn al ludkreado, kaj permesas al ni verki en pli diversaj esprimmanieroj kaj medioj. Por Esperantujo, kie la eldonado de libroj ĉiam prezentas grandan problemon, ili reprezentas unikan metodon verki kaj ‘presi’ literaturon, kiu kaj estas facile havebla kaj montras la flekseblecon kaj vivantecon de la lingvo.

Bitsy (bíci) estas ĝuste tia ilo. Per ĝi oni povas krei simplajn ludojn, kun tri koloroj, dialogoj, kaj animaciaj rastrumbildetoj. Tamen, oni ne alfrontas la kutiman problemon ĉe ludkreado – ke estas tiel multe da opcioj, ebloj, laboro necesa por krei belan kaj engaĝan mondon, ke oni ne scias, kie komenci. En Bitsy, oni havas nur po 8×8 rastrumojn en ĉiu tegolo, per kiuj oni kreas la ‘ĉambrojn’, kaj ne eblas konstrui komplikajn ludajn sistemojn, krom uzante simplajn variablojn kaj objektojn.

Screen-SpriteEdit1_d600
Ekzemplo de mapo, dialogo, kaj la grafikkreilo.

Tio eble ŝajnas simplisma, limiga ilo, kun malmulta potenco por ‘veraj kreaĵoj’. Sed ĝuste estas pro la simpleco de Bitsy, ke ĝi tiel allogas min. En Bitsy, oni povas plani, skizi, kaj ellabori tutan ludon ene de kelkaj horoj. Ĝi verŝajne ne estos ege profunda nek tre longa, sed oni povas bele prezenti konceptojn kaj ideojn, montrante sian kreemon per diversaj rimedoj. La finrezulto estas kvazaŭ ‘novela ludo’.

5tzfem
Elĉerpaĵo de la ludo ‘sen celloko’, ludebla en Esperanto.

Bitsy krome havas aktivan, bonvenigan komunumon. Oni multe diskutas en la babilejo de Discord, kaj estas regulaj ‘ludmarmeladoj’ (game jams) ĉe itch.io, retejo por sendependaj ludkreantoj. En la marmeladoj, oni alŝutas ludojn pri specifa temo, kaj ludas/komentarias la ludojn de aliaj. Baldaŭ okazos marmelado, kies temo estas ‘neĝo’, al kiu mi partoprenos.

Ĉi ĉio interesas min ankaŭ parte, ĉar ĝi reprezentas tian kunlaboreman etoson, kian ni povus havi en Esperantujo. Mi tre ŝatus, ke estus pli da interverkado, disverkado, kunkreado, kunludado, kiam temas pri Esperanta literaturo, kaj ke oni ne ŝlosu la spertojn de tio malantaŭ pordoj de multkostaj paperaj libroj, belartaj konkursoj kaj Literaturaj Babilejoj.

Mi esperas, ke mi incitis intereson ĉe vi, kaj ke vi mem provos Bitsy. Eĉ se vi ne estas tre videoludema homo, ĝi tamen povus esti inspira. Miaj plej ŝatataj ludoj kreitaj per Bitsy estas tiuj de mia amiko Mark Wonnacott, kiu kreis mojosan triptikon de ludoj je la temo de pereanta mondo. Mi tradukis ilin Esperanten, kaj mi invitas vin ludi kaj komentarii: sen celloko (parto 1), la finaj tagoj de nia kastelo (parto 2), akvorubo (parto 3).

Respondi

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Ŝanĝi )

Google photo

You are commenting using your Google account. Log Out /  Ŝanĝi )

Twitter picture

You are commenting using your Twitter account. Log Out /  Ŝanĝi )

Facebook photo

You are commenting using your Facebook account. Log Out /  Ŝanĝi )

Connecting to %s